Viernes 14.12.2018

Era esto

Lucierin ena obra de teatru pulíticu-social (no hablo abora de dingún cuerpu pulicial) que llamarin “transición democrática” las zunas que aprindierin ena “etapa anterior”.

mugu051218El mugu tapez el sabli de Liencris | edc

La democracia es el menos malo de los sistemas”, sulía uír y leer jaz años. Quinis lo dicían ya estaban arricunuciendo parti de la trampa cuandu dicían que era el menos malu en tal de dicir que juera güenu, pos eso es cumu dicir entonz que “La tiranía es el menos bueno de los sistemas”.

La mesma genti que dicía esas cosas amitía mui malagustu cualisquier upinión que pritindiera buscar salías mijoris

La trampa está en que no hai un sistema democráticu cuandu la democracia no es sistemáticu. N'un sistema de genti manduqueáu, de genti inoranti a la hora de saber por óndi li apreta el zapatu, el pueblu no tien el jarramental del cambéu pusibli, ni es a ponese n'alerta. Ensin tener capacidá pa desapará-lo güenu de lo malu tampocu se tien la capacidá de cambeá-la pulítica, asina que estamos n'un juegu colas cartas marcaas. La mesma genti que dicía esas cosas amitía mui malagustu cualisquier upinión que pritindiera buscar salías mijoris. Hebo siempri un aquél de disciplina de quin pasó pol ceazu del cuartel n'esi estáu cutianu d'alerta cola upinión encunfurmista.

A un tiempu, “Todos los políticos son iguales”, dicían, y arréu votaban entri los igualis al mas igual de toos, y dejaban el ijirciciu de la democracia enas sús manos. Fielis a la disciplina, al enterase de que yo no votaba, dicían: “Si no votas, no tienes derecho a quejarte”. Yo pienso justu lo contrariu, si votesti al tú inimigu, de qué te quejas? Siempri mi llamó la atinción esa clas de frasi que nunca uía dicir a dinguna presona de pristigiu, peru que la genti de la calli ripitía palabra por palabra, de carritilla, cumu aprindierin ena ilesia y ena escuela, tontaas too ello.

Toa esa riestra de pampirolaas la istuvierin ripitiendo por espáciu de muchos años, y lucierin ena obra de teatru pulíticu-social (no hablo abora de dingún cuerpu pulicial) que llamarin “transición democrática” las zunas que aprindierin ena “etapa anterior”.

Cumu nel mensaji patrióticu, unidad dentro de la diversidad, peru a basi de acabar callanducu colo diversu

Eran tiempos de vacas gordas, peru una cosa que sabemos de sobra si lo que mos apetez es saber, es que la culumía capitalista tien crisis aparejaas a los tiempos de adunicimientu. Mientras hebo dineru circulando, los pulíticos, los sendicatos, los fabricantis d'upinión, jacían el trebaju callanducu y aposáu, y llevaban la sú parti de piensu. “La entrada de las televisiones privadas será positiva para todas las cadenas incluídas las públicas, porque competirán para ofrecer la mayor calidad”, dijerin daquélla; y poca pocu el cuntiníu general jué pasando los espacios que habiera de cultura al cajón del “entertainment”, y la genti jue caa día un pocu mas tochu y otru pocu mas (tel)espetaor pasivu de la vida. “La televisión es un espejo de la vida cotidiana”, dicían, mientras la vida cutianu se cunvirtía n'un espeju de la tilivisión. A estas alturas, la vida del telespetaor tien guiunistas y cuandu li uímos upinar semejantis pampirolaas sabemos que repruduz el guión. La probeza de cuntiníos no casaba cola variedá de cadenas tilivisivas. Cumu nel mensaji patrióticu, unidad dentro de la diversidad, peru a basi de acabar callanducu colo diversu. Hai muchu de lo mesmu ondi iligir, cumu en pulítica, y cadenas tilivisivas que aparentan sinos pulíticos contrarios pertenecin al mesmu grupu empresarial, cumu los mesmos grupos pulíticos. Asina que el guión de las muestras vidas no lu iscribin ni tan disiquiera los guiunistas de la tilivisión, sino los empresarios que los contratan. Los cuntiníos, las preferencias, las upinionis, están pa empontigar a la genti ca ondi se quier que amiri.

Too esto se entarajiló ena época de vacas gordas, pa dir poca pocu sacándomos too lo pusibli. No ha hubíu reaición, asina que entá mos puein siguir sacando. Y cumu a juerza de sacamos tantu y tan arréu la vida va a pior y la genti anda rabiosu, mos van a ensenderar al facismu. Ya lo jacin. Con upinionis prudentis cumu las que pusi, poca pocu, callanducu, abora ya tenemos a tul mundu a puntu pa escoger entri una variedá de facistucas, facistas y facistonas, resultáu de la labor de zapping del sistema. Resultáu de procesos amejaos, esto va pasando por tul mundu. Europa, Nortiamérica, Brasil.

Asina que a la final era esto: cuandu toqui porque circula el dineru, el menos malo de los sistemas, y pa poder cuntinuar con ello enas crisis, el menos bueno de los sistemas. Democracia (Libertá de Mercáu, peru dichu con otru llamatu) y facismu: dos caras mui caras del mesmu negociu. Era esto.

Era esto
Comentarios