Miércoles 19.12.2018

Intigrismu ocidental, deidáis, curucas y devotos

Querer pan es cosa de genti ajambráu, genti del Tercer Mundu, y n'ocidenti estamos por cima. Aquí lo que queremos es Trebaju.

mugu151118Mugu variáu agarrándose al sosu mundu moernu | edc

N'ocidenti vivimos su la bota de un intigrismu, y es un intigrismu que ocidenti impon al restu'l mundu. El dios al que rindi cultu l'intigrismu ocidental se llama Ánimu de Lucru. Cumu cualisquier dios de cualisquier intigrismu, es intocabli y sagráu. Cumu cualisquier dios intigrista, está del lau de los que mandan y aministran, y vigila con muchu celu al pueblu.

Los sindicatos mijor pagaos polos gubiernos acercarin la Palabra de Dios al pueblu

L'intigrismu ocidental creó un panteón d'estatuas sagraas pa cultu popular, que son cumu santos apóstolis. El primeru d'ellos es el Trebaju. Entri probis es necesariu tener Trebaju, un bien sagráu que es propiedá de los ricos; los ricos tienin a bien repartilo a quin mijor lo mereza, si muestra interés por trebajar y desinterés pol sueldu. Mostrar interés pol sueldu es pecáu nel casu del probi. Los sindicatos mijor pagaos polos gubiernos acercarin la Palabra de Dios al pueblu, alabando las virtúis del Trebaju cumu un bien asulutu. Y los obreros, duendos, salían a la calli un añu tres otru pidiéndoli a los gubiernos que li dijeran a los ricos que lis dieran Trebaju, pos… quín quier pan? Querer pan es cosa de genti ajambráu, genti del Tercer Mundu, y n'ocidenti estamos por cima. Aquí lo que queremos es Trebaju, y no mos importa tantu el sueldu, cumu quin cunvida a la ronda.

Otru dios es el Dineru, peru es un dios tresitoriu, pa cuandu unu acanci la gracia de poder allegar a ser ricu. No molo contamos muchu, ni mui n'altu, peru sabemos que el Dineru es un bien sagráu que el probi no puei juntar col otru bien, el Trebaju. Eso siría igüísta. El Dineru sal de ser Emprendedor, es dicir, de sacalo del Trebaju ajenu. Ahí sí que hai licencia pal Dineru. El Dineru es tantu mas santu cuantu mas sea y en menos tiempu se saqui. Por eso el probi tien de ser aficionáu al Trebaju, pa poder repartí-la ganancia col ricu. “Tú mi das parti del tú vergonzosu dineru porque yo ti doi parti del mí atesoráu trebaju”, li diz el ricu al probi (sí, el ricu al probi y no al revés).

El Mercáu es el que pon las cosas nel sú sitiu. El Mercáu diz lo que se debi y no se debi jacer

Muchas vecis el probi no tien trebaju, y es porque, jolgacián, no se isjuerza en lo tener. Los sendicatos mijor suvencionaos pol gubiernu tratan de amirar pol probi jaciendo cursos. Esto mos lleva al otru dios importantísimu: el Mercáu. El Mercáu es el que pon las cosas nel sú sitiu. El Mercáu diz lo que se debi y no se debi jacer. El Mercáu diz que un probi hui tien de pegar cartelis, mañana repartir publicidá, pasáu limpiar una fábrica de rueas, a otru día soldar chapa, y arréu armar paréis. No tien sintíu saber un uficiu. El mercáu li diz al obreru que tien de ser frisibli y jacese a lo que li pida n'esi momentu, ensin estase a sueldu, horas y otras cosas que sólu pricupan a los obreros igüístas que no colaboran col Progresu.

El Progresu es el dios que acalda las juerzas  de la prudución: es cumu una redi de caminos a caa güelta mas grandis, por eso mos dicin que las autuvías son mas que dinguna otra cosa el Progresu, y tamién por eso la unidá de midía del Progresu por esta tierra es el camionáu d'esfaltu. El Progresu lleva los recursos humanos de las partis ondi le estorban a las partis ondi li pruducin réitu, y n'esa operación gana espacios disiertos enos que esplotando el terrenu puei ofreceli salías esesperaas de juturu a la poca genti que quedó, asina que tamién lleva esos ricursos que eran propiedá de la genti-ricursu a la manu'l ricu. El Progresu, jueraparti ricu, es patriota y cosmupulita, y es un mou de vida. El Progresu amira un cordal, y ya anda viendo una ringlera de mulinos eólicos: tul tiempu que se tardi en ponelos de verdá es una ofensa al diusucu Progresu, y l'aministración, ensemble cola empresa dan muchu arti enseñando devoción. No faltan intigristas con traza de moderaos ena pulítica, ni ena aministración, ni enas formacionis “verdis”, preparándosi un rincunucu ajayaízu pa viajar a gustu ena navi del caos. Gracias al sú trebaju, moderáu, asusegáu, prudenti, la genti-ricursu va ondi las deidais sagraas del Sagráu Ánimu de Lucru mandin, dejando atrás tarrentorios-ricursu que quedan vacíos a la sú ispusición, ufriciendo “últimas upurtunidais de vida” a los pocos que quedan, cumu quin li tira un flotaor de pagu al que primeru emburrió al agua pa que curriera piligru d'ajogase. Esti procesu, si dingunu jaz por lu aparar, va a pasar de la mesma manera ena selva amazónica que enos montis cantábricos. El intigrismu ocidental es el ánimu de lucru, y paez que no lo viéramos claru.

Intigrismu ocidental, deidáis, curucas y devotos
Comentarios