Miércoles 26.06.2019

La collera'l sapu

A ser tresgresor y escandalosu apostó muchu artista que d'aquella jacía ‘contracultura’ y haguañu jaz ‘arte de vanguardia’, eno mas altu.

mugu110419Flor clandistinu surdiendo del mugu | edc

Dendi críu li tuvi afición a los bichos, no de milagru, pos me mitierin por ello en casa. Tamién salí un pocu rebecu, que no malu, y cumu en casa luegu ti sacan un llamatu aprupiáu, el mí güelu dendi bien chicu mi sacó el de Bakunin, que tamién era una muestra de salir a la sangri. Y cumu de críu se suel ser de natural discutión y priguntón, creo que me empontigarin bien la zuna aquella.

Aluegu mas mozu dí en meteme ena música; arréu allegó el punk a la mí vida y aquello sirvió pa atiesar dellas ideas, y al tiempu, a quitar otras. Lo agraezo, masque dellas cosas no me arrijundierin jasta tardi.

El escándalu anda necesitáu de un sistema del que riíse, y siría poca cosa ensin él

El punk tien un aquél provocativu. Hai una parti de los artistas u del arti que siempri tien la provocación a manu. Es mui resultonu. Col tiempu, unu si puei dar cuenta de que a vecis se queda namás que n'un visaji, resultón, peru pocu mas que eso. Y si unu no se da cuenta, bien si vei que el sistema sí. Ser tresgresor es un visaji, de la manu del sistema. El escándalu anda necesitáu de un sistema del que riíse, y siría poca cosa ensin él. A ser tresgresor y escandalosu apostó muchu artista que d'aquella jacía contracultura y haguañu jaz arte de vanguardia, eno mas altu. Si el Punk nació rebelándose rebecu contra el rock de los dinosaurios, hui vemos a genti de Pink Floyd apoyá-la causa palistina y a un tiempu, ramalear al cantanti de los Sex Pistols. Las cadenas de ropa baratu ti puein vendé-la camiseta con mensaji tresgresor, el pantalón ya rotu y la cazaora de cueru. El sistema fabrica prudutos de poca chicha y envoltoriu mui guapu, y sigún es la prudución arrisulta quin lo pruduz y compra, espeju en carni. L'arti tresgresor es escandalosu y gusta de selo; hay otra clas d'arti que asiñala derechu lo féu del sistema, y esa genti es a lo en daqui época de la Hestoria li cortan las manos n'un estadiu u tirotean en un campu. No será tan tresgresora, peru cuenta verdais.

Una cosa que mi llamó la atinción de críu jué la gorguera del sapu. Dendi jaz siglos al sapu se lu pinta con una collera de picos que paez, punk orgánicu, un collarucu de pinchos. Siempri nel arti, porque yo a los sapos y ranas que conozo enjamás lis vi cosa amejaa. Y tampocu lo ví arretratáu en dingún otru sapu u rana del mundu. Es imagin que vien de mui antiguu, dendi jaz muchos siglos y que allega jasta mui acá, pos inclusu los cartelis escolaris aquellos de tela de principios del siglu pasáu y bien acá, jasta la rana de los Teleñecos, tien la sú collera de picucos. Asina que la collera'l sapu es un casu claru de jasta qué puntu mos creemos lo que si mos diz ensin discutilo, masque la rialidá molo muestri distintu a caa momentu que puei, si queremos tener ojos pa veer.

Ser bufón era ser unu mas de la plantilla laboral de la Corona

Los bufonis eran los tresgresoris del sistema de antañu. Los reis, que encarnaban el poder asulutu, que dicidían con una palabra la muerti de cualisquiera, tinían siempri cerca a los bufonis, que dejando caer verdais encómodas, tamién sirvían pa que aquella gentona oyera cosas y supiera óndi poner cuidu, siempri en provechu propiu. Ser bufón era ser unu mas de la plantilla laboral de la Corona.

Tardé muchu en dami cuenta de que el bufón ha de tomá-l sú llamatu del sapu, Bufo en latín. El traji de bufón lleva la mesma collera que li pintan a los sapos dendi los principios. Pa que paeza un sapu, la collera arrienda una parti del sapu que es mintira, que enjamás tuvo, peru que tul mundu aceta porque asina si lo enseñarin, masque sea impusibli de veer ena naturaleza. El bufón es un tresgresor simpáticu al poder, con un ataval ridículu y la mesma consideración que, por desgracia, entá se li tien a un sapu.

Hui pa comer de la manu de quin a los demás pisa, pueis probar a ponete en plan tresgresor, ya sea al treviés del arti, u de la pulítica inclusu; ya ti dirá qué debis jacer cuandu estés arriba.

La collera'l sapu
Comentarios