Jueves 18.04.2019

Partajuera, partadrentu

Muchas vecis pasa eso, que lo que se opón a lo establicíu es un pocu tamién frutu del ordin de cosas que pretendi negar.

mugu100119Mugu rejeláu | edc

Partajuera. Pecamos d'amirá-las cosas pola corteza, u si quieris de corteza pa amirá-las cosas.

A una güelta salió iscritu que lo que llamamos Planeta Tierra dibía ser llamáu en verdá Planeta Augua, pos ena mayor parti está cubiertu pol augua marinu, y no pola tierra continental. Y esto tinía la traza de ser una revelación mui jonda, que echaba a piqui la idea que tiníamos asentáa. Muchas vecis pasa eso, que lo que se opón a lo establicíu es un pocu tamién frutu del ordin de cosas que pretendi negar, pos es nacíu -masque sea a malagana- d'esi contornu social.

Asina que de manu tenemos un planeta Tierra, que de no ser pola luz cercanu que irraya el Sol, estaría ena iscuridá cuasi total. Peru vistu de la manu iculugista que se pricupa del estáu de los océanos, tenemos el discursu alternativu de que es en rialidá el Planeta Augua, u asina merez por derechu ser llamáu.

Partadrentu. Jaz pocu la Hestoria gulvió a jacer remanecer a los dóberman; los perreros del dineru tienin que echar manu ya de las razas villanas, pa acanzar ondi no allegaban colas mansucas.

Dicin los dóberman (iligíos pol Capital al treviés del pueblu) que el cambéu climáticu es un inventu marxista pa evitá-l progresu

Partajuera. Dicin los dóberman (iligíos pol Capital al treviés del pueblu) que el cambéu climáticu es un inventu marxista pa evitá-l progresu. Y salimos a ajirmá-la idea de que es una cosa mas que comprobaa pola Cencia. L'asuntamientu es Cambéu Climáticu sí u Cambéu Climáticu no. Y si escasu, lo relochos y lo villanos que son los dóberman pulíticos, por dicir esa clas de cosas. Arréu correrán ríos de tinta impresu y gajaas abondas cumu pejis en manjúas de luz surdirán españaas por millonis de pantallas pa quedar prindías ena Redi. Habrá asuntamientu pa ratu.

Partadrentu. Amiramos a los dóberman pulíticos ensin veer que es el momentu. Es el Mercáu quin los pon, y los pon a sacar ricursos de ondi entá no los bían pudíu sacar. Pa eso jará falta matar indios ena Amazunía y que enos pueblos cuasi ensin genti de la curdillera cantábrica mandin cuatru cacicucos de palabra de mil duros con ganas de vendeli el tarrentoriu al primer postor, y que se echi abaju l'arbuláu que cubri Siberia, y que la genti negru se ajuegui por millonis si jaz falta nel Mediterrániu, u lo cacin pa esclavu en Libia. El Libri Mercáu, vistíu de Sistema Democráticu, tien daqui ganaoris y millonis de perdeoris pusiendo l'hombral y jasta la cabeza pa que los otros pisin mientis ellos se ajuegan ena balsa de la lamiza'l Progresu. Y el planeta ya no da pa que el Capitalismu caltenga y muchu menos adoneza los livelis de cunsumu. Malaspenas lo daba cuandu el cunsumu era cosa de ocidentalis, muchu menos va a dalo cola China cumu potencia capitalista. Si caltené-l American Way Of Lifesembró y siembra guerras a voléu por tul mundu, qué no pasará colos nuevos ricos chinos? Se caltendrá el negociu esportando democracia verdaéru y garantizando los derechos humanos y el desarrollu caltinibli? De manu, la direición es la contraria: están a falta d'un mundu ensin leis, cola escusa del atrasu cultural y religiosu del tercer mundu y del mundu petrulíferu. Las potencias y prepotencias ocidentalis acudin a los continentis probis al arrampli, al simen de los butris a los carcajonis varciaos del muradal, buscando ganá-l sú espaciu de respañu. Es ya un mundu ralu pa tantu capitalista cubiciosu cumu había, y se van a añidir muchos mas a la tarja.

Viéndolo partajuera, en tal de asuntar de esto, asuntaremos del calentamientu global, empontigáu de manu el asuntamientu.

Partadrentu, arrisulta que el muéstru planeta ni es Planeta Tierra ni es Planeta Augua, es el Planeta Lava. Los continentis son navis de piedra y tierra a la diriva, resbalando n'un corazón de lava alampando; el muéstru planeta es muchu mas luminosu por drentu que por juera. Somos una especii pasona que va de tierra en tierra, cuándu en pateras,cuándu por paseras. Acomparáu, el muéstru corazón está siendo hiju de la friúra y la iscuridá, hiju de la corteza. Una corteza rejelaa y ciega. Estamos n'esti mundu cumu si enjamás biéramos estáu, cumu si no biéramos diprindíu naa.

Partajuera, partadrentu
Comentarios