Domingo 16.06.2019

Quiciabis mañana

Enas nochis de mar tranquilu, pateras de mucha pior traza tratan de cruzar al continenti de los ricos atestaas de genti probi a buscu de un mediu de vida n'un cuntinenti fríu con genti de corazón rejeláu.

mugu131218El mugu tresna por cima l'artificiu | edc

Quiciabis mañana la carama que atiesa rejelaas las neuronas de quinis mandarin y mandan –amargas réplicas ajita, cumu deslabonis curujientos ena cadena que atiesta la ruea de la Hestoria– atarreñi iscubriendo un contornu ajallaízu, un mundu dinu de llamase con justicia, humanu.

Jaz cuatru días el regazu de Gibraltar, abergando la asolejaa badía d'Algeciras, se acodaba ca un l'estrechu  que el Sol, africanu ensin duda, jacía relumbrar n'un procesu que paiciera eternu. Mansos de traza, los petroleros y cargueros isfilaban ispaciucu, jablaos pola vara tresparenti del mercáu, llevando, calabris de jierru avariciosu, las entrañas astraas de las esencias visiblis y soterrañas de la tierra africanu. Curriendo la mesma suerti de la genti que lo pisa, ello remanez baratu n'un mundu que li pon a golpi de flis y plantilla un letreru que lo riduz a ricursu. La vida del ricursu paez que no jallara otra cosa que abertalis ispiadaos, estamengaa diquiá allá por genti de traza finu y aquél de piedra intirizu.

De la soberanía a la dependencia, y del valese a la sirvidumbri

Arrebujáu al calurucu ya encuncibibli del hibiernu del estrechu, y aseláu pola amósfera grasa que el sol altu atiesa enas llanas caldeaas del sur, la estampa de manu amabli de aquél contornu nuevu mi anagó la imprisión del día primeru. A otru día, remanicían cumu dándosi a veer los detallis. Aquel estrechu que acomodó el cruci d'un cuntinenti a otru y del otru al unu, bía síu un senderu de tránsitu que aluegu se gulvió cruci cola navegación de calu. Y cuantu mas grandis juerin los barcos, mas se jezo golver necesitaa a una genti que tuviendo pocu, jasta aquel día tuvo pa jartu valese. Enos trataos de comerciu, calláu estaba dichu que el negociu estaba entri una potencia rica que cunsumía pusiendo los medios y los grandis mercaderis, y una nueva casta terreña de traficantis que manduquearan con puñu de jierru si a manu viniera. La cundición del tratu era la desigualdá. Caúnu nel sú papel, n'una escalera que iscumienza n'un taparrabos tropical y trimina muchu más arriba n'altura y latitú, n'un traji de ricu ocidental cebáu, de seda y algodón. De la soberanía a la dependencia, y del valese a la sirvidumbri. Una lición que aprindierin bien luegu los europeos y que cuandu juerin asimilaos por aquel sistema llevarin cumu tratu forzosu al restu de cuntinentis.

Los trataos de comerciu son la parti de juera d'un traji de traza respetabli forráu con leis penalis. Entá hui los culpablis se distinguin por vistir de traji respetabli.

Genti y ricursos son surbíos pola aspiraora planetaria del Mercáu, n'un aceleratu kamikazi

Enos días de mar tranquilu las lanchas trafican de la continenti que pruduz al que cunsumi. Enas nochis de mar tranquilu, pateras de mucha pior traza tratan de cruzar al continenti de los ricos atestaas de genti probi a buscu de un mediu de vida n'un cuntinenti fríu con genti de corazón rejeláu. Genti y ricursos son surbíos pola aspiraora planetaria del Mercáu, n'un aceleratu kamikazi. Europa se atrinchera ena miseria de luxe empleando a los paísis más cercanos cumu sicarios de manu duru, jaciendo el trebaju suciu d'aterrar el distierru, y güelvi la esclavitú de los negros en Libia; esta vez nu hai que dir a buscalos, ellos solos vienin a la cadena, atrevesando el disiertu. Sólu pola hazaña de pasar jasta partacá l'estrechu atrevesando vallas, disiertos y maris si tienin miricíu el derechu de estar a esta manu. No será humanidá lo que li enseñemos, cuandu el refleju del sol del estrechu vien pol brillu d'una mar en calma que es la losa n'una tumba d'augua saláu.

Quiciabis mañana
Comentarios