sábado 21.09.2019

Enreosu

La manera mas sigura de tener un sueldu pa vivir a basi de pasta, arroz y pan de mintira, es dicir "Sí Señor" al trebaju que ti ofrezan.

mugu050919Limu. Hiroshima está undiquiera | edc

No está tan cincillu d'acaldar. Se trata de dejali una vida mijor a los muéstros hijos de la que vivimos nós.

Diz que tenemos el mijor de los sistemas pusiblis, y encontoo, no está tan cincillu.

Aquí vas al supermercáu a comprar cumida baratu, y lo normal es que güelvas

Vivimos ena manu'l mundu que en tal de parecer guerras, las aministra. Aquí vas al supermercáu a comprar cumida baratu, y lo normal es que güelvas. Jaz naa cumu quin diz n'una Bosnia, y abora mesmu n'una Siria, vas pol pan y ti pegan un tiru u ti cai una bomba, a tí y a ochenta mas. Eso si, puei que el dineru que pagarin por esa bala u esa bomba vaiga a una empresa española que da de comer a muchas familias españolas, que dependin a la final de que mucha genti que va a pol pan no güelva a casa aquel día. Es enreosu.

Güenu, pos vas a pol pan. Un pan baratu, baratu lo primeru, baratu sobri too, que si anguna vez cumisti pan ya notas bien la difiriencia. Tantu, que ya se habla d'una lei pa qu'el pan, jarina-yelda-augua-sal, sea pan, sólu jarina-yelda-augua-sal. Son ingridientis de lo mas cumún y abondu, peru gracias a la lei de la oferta y la demanda, y al ánimu de lucru (que es el fundamentalismu intigrista n'Ocidenti), pican en ralos pa la receta moerna  d'esi panuciu de mil llamatos que en saliendo del jornu en tal de triscar, mollea. Quiciabis podamos golver a comer pan cumún, jechu de lo que se jaz el pan, peru quiciabis tamién eso suponga alteriar tantu el negociu de las panificaoras que lo mesmu una cuanta genti tien de dir a la calli, u tenemos que pagá-l pan de verdá a un preciu de verdá. Y no es tan cincillu, porque el pan, l'artículu de cunsumu mas cutianu, es el mijor ejemplu de cúmu l'abaratamientu del cunsumu sal caru. Es too tan baratu que se vivi apuráu con un selariu igual de baratu, una vida baratu de verdá. Ya no se puei vivir a un preciu justu una vida normal, si no se es un potentáu ena comparanza. Asina que de manu, a comer de diariu pan ensin pan. Mollea y no es pan, peru es baratu. Comelo de lo de verdá siría, es, enreosu.

Eso no quita que te echin mañana, porque ya se acuparin bien de diciti que hai mas genti por tras pa entrar a trebajar

La manera mas sigura de tener un sueldu pa vivir a basi de pasta, arroz y pan de mintira, es dicir "Sí Señor" al trebaju que ti ofrezan. Será un trebaju ensin derechos.Sí Señor. Firmarás media jornáa y trebajarás el dobli. Sí Señor. No ti pagarán las estras. Sí Señor. Tendrás d'estar ispunibli cualisquier día de la semana. Sí Señor. No podrás cogé-la baja casu que t'acidentis. Sí Señor. No reclamarás derechos firmaos ni de conveniu. Sí Señor.  Tendrás que dir a la cena d'empresa y riíli toas las gracias al jefi, cumu que sois amigos íntimos, sabis que estarán pindientis de cúmu te portas. Sí Señor. Eso no quita que te echin mañana, porque ya se acuparin bien de diciti que hai mas genti por tras pa entrar a trebajar. Sí Señor. Sabis que no vas a tener nunca un puestu fiju de trebaju, y que andarás dijendo Sí Señor en una trisca de trebajucios diquiá que te veas entregando la cuchar. No es tan cincillu.

Los que vienin por tras no tienin traza de amijorá-las cosas. Vivin pal cunsumu y no cunucierin otra vida. Lo que pa tí jue a pior, pa ellos es lo normal. Vivin pindientis de cosas cumu tené-l últimu moelu de móvil del mercáu, y ricibierin una aducación pa ser genti simplonu de too. Y la mayuría lo son. No es que encortin las palabras cuandu iscribin, es que tienin milis de palabras menos y el pensamientu aminorgáu pola falta de vocabulariu, y el sintimientu tamién. No tienin jarramental pa desarrollar, acaldar, atamañar u julgá-las ideas. Intindirían los términos del contratu si istuvieran iscritos sigún el Libru d'Istilu del Reguetón, u si bieran redataulu Los Chichos, peru entá no está de ser. Los grupos que aluchan polos derechos del cumún y las causas socialis malaspenas ricibin genti nuevu, genti jovin. El papel de los inteletualis lu tienin los youtubers, y la fama que tienin entri'l públicu juvinil es la de cobrar bien polo que dicin. Pa ellos lo guapu de tener upinión u ideas es sacalis reítu monetariu. La mijor sociedá colonial no lo da tan bien rematáu cumu lo que ya mos vien. Sí, amijorar es enreosu.

Y cumu jue aducáu pa ser duendu, tochu y simpli, pa él esa amenaza es un africanu u sudamericanu

Cuandu cunsigui un trebaju d'empresti, que son los únicos que hai, el trebajaor moernu tien un miéu jondu: que unu mas muertu de jambri que él si lu quiti. Y cumu jue aducáu pa ser duendu, tochu y simpli, pa él esa amenaza es un africanu u sudamericanu. La cumpitición a ver quín es mas muertu de jambri ena empresa es un juegu entarajiláu pol patrón colos sendicatos amirándosi la manicura y la plantilla estamengando el rabucu y ladrando cariñosu "bau!!bau!!", peru el trebajaor modélicu nu puei odialos porque sinti que son los suyos. Prifier metese cola genti probi que ajuyi de la miseria material. De miseria ispiritual ya va él bien sirvíu. Se puei tratar de jacer que intienda la rialidá, peru sigún tien de necesitáu l'ispíritu arrisulta enreosu. No, no está tan a la manu.

Con semejanti moelu de pueblu ena parti aventajaa -y avejentaa- del mundu, cunsumiendo baratu el prudutu que vien del restu´l planeta, y viviendo enos estaos que aministran las reglas del Comerciu y si fallan, las de la Guerra, es difícil pensar que las cosas amijorin no ya de súpitu, sino poca pocu. Dendi que se juerin acabando las rivulucionis lo mas revolucionariu de lo que uímos hablar son dellos moelos de móvilis. Los móvilis nicisitan coltán, y el Mercáu lo cunsigui baratu n'una África que se escasta cuándu a tiros, cuándu a machetazos. Cumu col coltán pasa con muchos mas prudutos que el llamáu Tercer Mundu tien. Aministraa por un Ocidenti cunsumista en casa y guerreru juera, la ricura'l mundu se cunvierti en desgracia pa los nativos, que puein matase, u murise, peru lo que no se lis amiti es que quieran vinise a vivir ondi a unu no lu matan indo pol pan. Eso se jaz por aparalo enguisándolos a campanos tapaos pa que se matin, peru la rialidá es que no se es a aparalo y va a allegar un día que no va a haber pejis bastantis pa comesi a tantu ajogáu nel Mediterrániu.

El preciu de una vida ocidental pacífica armaa con selfies, pantallucas, melanis de culurinis y pan de mintira es un estáu de guerra, jambri y desesperación pa tres cuartas partis del planeta. Quiciabis se puea amijorar eso, peru los ciudadanos ocidentalis son mui celosos de las sús pantallucas y melanis, y han dichu muchas vecis Sí Señor a los que lis dijerin que no, que no hai pan pa tul mundu, masque en rialidá ya no haiga ni pan verdaeru aquí mesmu. Es enreosu.

Enreosu